عاقئللئ یان یوُلداش
عایالئ بیلِن اِرتیرلیک اِدینِن آدامسئ، ایشه گیتمأگه تاییارلانئپ باشلادئ. آچارئنئ آلماق اوٌچین ایچِرکی اوُتاغداکئ ایش ستوُلنئنگ یانئنا باردئ. بیردِن ایکأ ستوُلنگ اوٌستوٌنی وِ تِلِویزوُرئنگ یوٌزوٌنی چالا اؤرتِن چانگ-توُزانا گؤزی دوٌشدی. اوُل آچارئنئ اؤنگکی یِرینده غوُیدئ-دا، اوسوللئق بیلِن اوُتاغدان چئقدئ وِ پاراخات أهِنگده عایالئنا یوٌزلِندی: «کیوانئ، ایش ستوُلومئنگ اوٌستوٌندأکی آچارلارئمئ آلئپ غوُیبِر» دییدی. عایالئ اوُتاغا گیریپ، ستوُلنگ اوٌستوٌندأکی آچارلارئ آلماقچئ بوُلاندا، چانگلارئنگ اوُرتاسئندا بارماق بیلِن یازئلان: «مِنینگ عِزیزیم» دییِن یازغا گؤزی دوٌشدی. عایالئ بو یازغئنئ اوُقادئ وِ آچارئ آلئپ، اوُتاغدان چئقماقچئ بوُلاندا، تِلِویزوُرئنگ یوٌزوٌندأکی «عؤمروٌمینگ هِمراسئنا سؤیگی بیلِن!» دییِن یازغئنئ هِم گؤردی. عایالئ آدامسئنا آچارئ غوُوشوردئ وِ موٌین غاتئشئقلئ یئلغئرئش بیلِن یوُلداشئنئنگ یوٌزوٌنه غارادئ. بو یئلگئرئشدا: «اؤیوٌنگ آراسساچئلئغئ اوٌچین موندان بِیلأک خاص چئنلاقای آلادا اِدِرین» دییِن مانئنئ اوُقاماق موٌشگیل دألدی. آدامسئ یازغئسئنا ماغات دوٌشوٌنِندیگینه گؤز یِتیردی وِ یئلغئرئشا یئلغئرئش بیلِن جوُغاپ بِردی. اوُل یان یوُلداشئنئنگ بأریدِن غایدیان کأبیر حِرِکتلِرینه ازگئرئلجاک، غئغئرجاق، حایبات آتجاق یا-دا یازغارئپ، کؤتِکلِجِک بوُلمادئ. هِر بیر زادا مئلاقاتلئ وِ گؤونه دِگمِزلیک بیلِن چِمِلِشدی، غاراشئلیان نِتیجأنی هِم آلدئ. أهلی یاغدایدا هِم مئلاقاتلئ، حوُشغئلاو بوُلماغئ اونوتمالئ دألدیر.
راحمِت غئلئجوُو،
«حالاللئق قئصصالارئ» کیتابئندان.
